Mjúk, seðjandi og ótrúlega góð hafrastykki sem henta jafnt í nesti, kaffið eða sem millimál. Þau eru einföld í gerð og geymast vel í kæli.
Hráefni
Blaut hráefni
- 120 g smjör eða smjörlíki (ég notaði smjörlíki fyrir ofnæmispésann minn)
- 3 msk maple síróp
- 2 msk ljóst síróp
- ½ tsk vanilludropar
Þurr hráefni
- 230 g haframjöl
- 10 g Rice Krispies
- 20 g kókosmjöl
- 80 g púðursykur
- ½ tsk gróft salt
- ½ bolli þurrkuð trönuber
- ½ bolli döðlur, smátt saxaðar
Aðferð
- Hitið ofninn í 175°C.
- Setjið smjör eða smjörlíki, maple síróp og síróp í pott og hitið við vægan hita þar til allt hefur bráðnað saman. Hrærið vanilludropunum út í.
- Blandið saman haframjöli, Rice Krispies, kókosmjöli, púðursykri, salti, trönuberjum og döðlum í stórri skál.
- Hellið vökvablöndunni yfir og hrærið þar til allt hefur blandast vel saman.
- Klæðið bökunarform (um 20 × 30 cm) með bökunarpappír.
- Dreifið blöndunni jafnt í formið og þrýstið henni vel niður. Gott er að nota kartöflustappara eða botn á glasi til að þjappa henni vel.
- Bakið í 20 mínútur, eða þar til yfirborðið er orðið fallega gyllt.
- Látið standa í nokkrar mínútur áður en þið takið úr forminu.
- Skerið í hæfilega bita með pizzaskera eða beittum hníf og leyfið stykkjunum að kólna alveg áður en þau fara í geymsluílát.
Geymsla
Geymið hafrastykkin í loftþéttu íláti í ísskáp. Þau endast vel í nokkra daga og eru líka mjög góð til að frysta.
💛 Birnu-ráð
- Skiptið trönuberjum út fyrir rúsínur, apríkósur eða súkkulaðibita ef þið viljið breyta til.
- Hægt er að bæta við söxuðum hnetum eða fræjum fyrir meiri fyllingu.
- Mikilvægt er að þrýsta blöndunni vel niður í formið, þá halda stykkjin lögun sinni betur.
Upprunalega uppskriftin er frá Ljúfmeti og lekkerheit. Ég breytti henni lítillega svo hún hentaði betur fyrir ofnæmispésann minn og bætti einnig við trönuberjum og döðlum.
Ummæli
Skrifa ummæli